ប្រធានមជ្ឈមណ្ឌលសិទ្ធិមនុស្សកម្ពុជា (CCHR) លោក អ៊ូ វីរៈ បានសរសេរលិខិតចំហរមួយ ទៅកាន់លោក សម រង្ស៊ី ប្រធានគណបក្សសង្គ្រោះជាតិ និងសមាជិកទាំងអស់ ដោយបានសម្ដែងនូវការព្រួយបារម្ភ ចំពោះសន្ទរកថារបស់ លោក សម រង្ស៊ី ដែលបានហៅជនអន្តោប្រវេសន៍វៀតណាមថា«យួន» ជារឿយៗ ដែលពាក្យនេះត្រូវបានគេចាត់ទុកថាជាពាក្យសម្ដីបង្អាប់បង្អោននោះ។
នៅក្នុងលិខិតនោះដែរ លោក អ៊ូ វីរៈ បានសម្ដែងនូវការខកចិត្តជាខ្លាំង ព្រោះថាបន្ទាប់ពីមានការកាត់បន្ថយនូវពាក្យសម្ដីរើសអើង ប្រឆាំងនឹងជនជាតិវៀតណាមនៅមុនពេលបោះឆ្នោត ឆ្នាំ២០១៣រួចមកនោះ ពាក្យសម្ដីនេះត្រូវបានគេប្រើជាថ្មីម្ដងទៀត ដែលធ្វើឲ្យប៉ះពាល់ដល់ជនជាតិវៀតណាម។ ប្រការនេះ ពិតជាអាចលើកទឹកចិត្ត ឲ្យមានការរើសអើងចំពោះជនជាតិវៀតណាម-សញ្ជាតិកម្ពុជា ក៏ដូចជាជនជាតិវៀតណាមដទៃទៀត ដែលកំពុងរស់នៅក្នុងប្រទេសកម្ពុជាផងដែរ។
លើសពីនេះទៀត ប្រធាន CCHR រូបនោះក៏បានសម្ដែងនូវការខកចិត្តចំពោះពាក្យសំដី នៅក្នុងសន្ទរកថាមួយរបស់លោក សម រង្ស៊ី ដែលថាលោកនាយករដ្ឋមន្ត្រី ហ៊ុន សែន «អន់ជាស្ត្រី» នោះ។ ដោយលោកបានលើកឡើងថា ប្រសិនបើសម្ដីនោះពិតមែននោះ មានន័យថាស្ត្រីមានសមត្ថភាពចាញ់បុរស ដែលនេះជាប្រការពុំអាចទទួលយកបានឡើយ។ប្រការនេះនឹងបង្កឲ្យមានអ សមភាព យ៉ែនឌ័រ និងការបង្ខូចនូវទំនៀមទម្លាប់ផ្នែកយ៉ែនឌ័រ និងការធ្វើឲ្យប៉ះពាល់ដល់ការអភិវឌ្ឍន៍ ប្រកបដោយសមភាពនៅកម្ពុជា។
នៅក្នុងសន្ទរកថាមួយ កាលពីពេលកន្លងទៅនៅឯខេត្តសៀមរាប លោក សម រង្ស៊ី បានធ្វើការប្រៀបធៀបថាលោកនាយករដ្ឋមន្ត្រី ហ៊ុន សែន អន់ជាងលោកស្រី យីងឡាក់ ដែលហ៊ានចុះចេញពីតំណែង ហើយព្រមរៀបចំធ្វើការបោះឆ្នោតឡើងវិញនោះ ដោយលោកបាននិយាយថា៖« ហេតុអ្វីបានជាលោក ហ៊ុន សែនអន់ជាងស្ត្រីម្លេះ? »។ បន្ទាប់មកអ្នកគាំទ្រកណបក្សសង្គ្រោះជាតិ បន្ទរសម្ដីតាមលោក សម រង្ស៊ី ដោយស្រែកឡើងថា« ហ៊ុន សែន អន់ជាងស្ត្រីៗ ! » ។
លោក អ៊ូ វីរៈ ក៏បានធ្វើការស្នើរសុំឲ្យ គណបក្សសង្គ្រោះជាតិ ធ្វើការបញ្ជាក់គោលជំហររបស់ខ្លួន ហើយប្រសិនបើសេចក្ដីថ្លែងការណ៍ខាងលើនេះ ពិតជាបានធ្វើឡើងមែន គួរតែសូមធ្វើការអភ័យទោសជាសាធារណៈ ចំពោះការដែលបានប្រើពាក្យសម្ដី ដែលមានចរិតលក្ខណៈរើសអើងនេះ ៕
Cambodia Kingdom Of Wonder 