ភ្នំពេញ៖ កំពូលតារាចម្រៀងយុវវ័យ នាង ឱក សុគន្ធកញ្ញា ជាតារាចម្រៀងស្រីឈានមុខគេមួយរូប ប្រចាំផលិតកម្មរស្មីហង្សមាស។ ខាងក្រោមនេះ ជាប្រវត្តិពិតរបស់នាងដែល “ថ្មី” នឹងបង្ហាញជូនមិត្តអ្នកអានយ៉ាងពិស្តារ។
ឱក សុគន្ធកញ្ញា នាងមានទីកន្លែងកំណើតស្ថិតនៅ ខណ្ឌចំការមន រាជធានីភ្នំពេញ មានបងប្អូនបង្កើតចំនួន៣នាក់ ដោយនាងគឺជាកូនច្បងនៅក្នុងគ្រួសារ។បន្ទាប់ពីបានប្រឡងជាប់ថា្នក់ មធ្យមសិក្សាទុតិយភូមិ (បាក់ឌុប) នាងក៏បានទៅបន្តចាប់យកជំនាញសិល្បៈនៅឯសាកលវិទ្យាល័យ ភូមិន្ទវិចិត្រសិល្បៈ។ ឪពុករបស់នាងមានឈ្មោះ ឱក បូនី ជាតនន្ត្រីករ និង ម្ដាយឈ្មោះ អ៊ីន សុគន្ធ ជាគ្រូបង្រៀន និង អ្នកបង្ហាត់រាំនៅក្នុងសកលវិទ្យាល័យនោះ។
កញ្ញា បានចាប់ផើ្ដមមានទំនោរចិត្តទៅនឹងវិស័យសិល្បៈតាំងតែពីអាយុ១០ឆ្នាំ មកម្ល៉េះ។ ដំបូងឡើយ ឪពុករបស់នាងមិនដែលដឹងថា នាងមានសមត្ថភាពច្រៀងនោះទេ ថ្ងៃមួយ លោកក៏មានភាពភ្ញាក់ផ្អើល នៅពេលដែលឮសំលេងកូនរបស់ខ្លួនច្រៀងចេញពីជញ្ជាំង ខណៈពេលដែលកំពុងបង្រៀនកូនសិស្សដទៃទៀតឲ្យច្រៀង។
ចាប់ពីពេលនោះមក ឪពុករបស់នាងតែងតែនាំនាងទៅតាមរៀងរាល់ពេលដែល គាត់មានការសំដែងម្ដង។ ឪពុករបស់ កញ្ញា បាននិពន្ធបទចម្រៀងសំរាប់ការសំដែងរបាំជូនពរឲ្យ កញ្ញា ច្រៀង ដោយគាប់ជួនថ្ងៃមួយ នៅពេលដែលអវត្តមានតារាចម្រៀងប្រចាំក្រុមតន្ត្រី របស់លោកឪពុកនោះ ឱក សុគន្ធកញ្ញា ក៏បានមានឱកាសច្រៀងនៅក្នុងការសំដែងនោះ។
នាងនិងម្ដាយជារឿយៗ តែងតែទៅផ្ទះរបស់លោក អៀ វឌ្ឍនា ដើម្បីច្រៀងខារ៉ាអូខេ។ លោក អៀ វឌ្ឍនា ដែលក្រោយមកក្លាយជាផលិតករប្រចាំផលិតម្ម រស្មីស្ទឹងសង្កែ បានសំរេចចិត្តផលិតអាល់ប៊ុមចំរៀងថ្មីមួយឲ្យ ឱក សុគន្ធកញ្ញា រួមជាមួយ និង លោក ឃុំ ប៊ុណ្ណាដែត អ្នកនាង យក់ ឋិតរដ្ឋា លោក សែម សង្វាត និងលោក ប៊ូ វិចិត្រ នៅក្នុងឆ្នាំ ១៩៩។
ងាកត្រលប់ទៅក្រោយវិញបន្តិច តារាចម្រៀងវ័យក្មេងរូបនេះ ក៏ធ្លាប់បានទៅចូលរួមការប្រកួតនៅក្នុង កម្មវិធីប្រឡងចំរៀងរបស់ស្ថានីយទូរទស្សន៍ក្នុងស្រុក២ផងដែរ គឺស្ថានីយទូរទស្សន៍ជាតិកម្ពុជា និង ស្ថានីយទូរទស្សន៍ខេមរភូមិន្ទប៉ុស្តិ៍លេខ៥ ប៉ុន្តែមិនបានទទួលលទ្ធផលអ្វីជាផ្លែផ្កាឡើយ។ បើទោះជាជួបនូវការបរាជ័យយ៉ាងណា ក៏នាងនៅតែបន្តការស្រលាញ់អាជីពចំរៀងដដែល។ បន្ទាប់ពីនោះមក នាងក៏បានចេញទៅច្រៀងនៅក្លឹប U2 នាពេលរាត្រី ហើយនិងច្រៀងឲ្យផលិតកម្មរស្មីស្ទឹងសង្កែផងដែរ ដោយរៀននៅពេលថ្ងៃ។
នៅក្នុងឆ្នាំ២០០៤ នាងក៏បានចាកចេញពីផលិតកម្មរស្មីស្ទឹងសង្កែ ដោយការចំណាយពេលវេលាអស់រយៈពេល២ឆ្នាំ នៅទីនោះ បានធ្វើឲ្យនាងទទួលបាននូវកេរ្តិ៍ឈ្មោះពីការច្រៀង ក៏ដូចជាអភិវឌ្ឍនូវទឹកដមសំឡេង រហូតត្រូវបានគេផ្ដល់ឱកាសឲ្យចេញទៅច្រៀងនៅឯប្រទេសបារាំងថែមទៀតផង។
បទចម្រៀងដែលធ្វើឲ្យតារាចម្រៀង ឱក សុគន្ធកញ្ញា ល្បីឈ្មោះខ្លាំងនោះ គឺបទ “ស្នាមស្នេហ៍សមុទ្ររាម” ដែលជាបទចំរៀងប្រចាំរឿងភាគរបស់ស្ថានីយ៍ទូរទស្សន៍CTN។ នាងធ្លាប់បានចេញទៅសំដែងនៅឯសហរដ្ឋអាមេរិក ជាមួយនឹងកំពូលតារាចំរៀងលោក ព្រាប សុវត្ថិ លោក យូ ឌីស្គូ និងក្រុមតន្ត្រី រ៉េតធីដូណា នៅក្នុងឆ្នាំ២០០៧ ដោយទទួលការស្ងើចសរសើរយ៉ាងខ្លាំង។
តារាចម្រៀងមុខប្រជាប្រិយរូបនេះ បានចាកចេញពីផលិតកម្ម U2 ទៅច្រៀងឲ្យផលិតកម្មសាន់ដេ ក្នុងកំឡុងឆ្នាំ២០០៧ ដោយសារតែផលិតកម្ម U2 ជួបនូវវិបត្តិក្ស័យធន់។ បន្ទាប់មកក៏បានចូលទៅជ្រកក្រោមដំបូលរបស់ផលិតកម្ម រ៉ក់ វិញ ហើយបានធ្វើឲ្យមានភាពល្បីឈ្មោះម្ដងទៀត ជាមួយនឹងបទចំរៀងដែលមានចំនងជើងថា “មោទនភាពជាតិខ្មែរ” និង “បេះដូងរងគ្រោះ” ។
នៅចុងឆ្នាំ២០០៧ ឱក សុគន្ធកញ្ញា ក៏បានសំរេចចិត្តចុះកុងត្រាឱ្យផលិតកម្មរស្មីហង្សមាសរយៈពេល ៥ ឆ្នាំ ដើម្បីក្លាយខ្លួនជាតារាចំរៀងប្រចាំផលិតកម្មនេះ។ ស្ថិតក្រោមទ្រនំថ្មីដែលមានគ្រឹះរឹងមាំ នាងបានច្រៀងនូវបទចំរៀងជាច្រើនបទ ហើយបានអភិវឌ្ឍខ្លួនក្លាយជាតារាចម្រៀងនាំមុខគេមួយដួង។ នៅខែ កក្កដា ឆ្នាំ ២០១០ នាងបានមានឱកាសចេញទៅសំដែងក្រៅប្រទេសម្ដងទៀតជាមួយលោក ព្រាប សុវត្តិ និង ក្រុមតន្ត្រី រ៉េតធី ដូណា នៅឯប្រទេសអូស្ត្រាលី ក្នុងគោលបំណងជួយសង្គម។
នាងមានភាពសកម្មទៅនឹងកិច្ចការសង្គមជាច្រើន ពោលគឺជាអ្នកទ្រទ្រង់អង្គការ AFESHIP ហើយក៏ជាអ្នកនាំពាក្យរបស់ HMFM ក៏ដូចជាក្រសួងកិច្ចការនារីផងដែរ។ មិនត្រឹមតែប៉ុណ្ណោះ នាងក៏ធ្លាប់បានចូលរួមសកម្មភាពជាច្រើនផ្សេងទៀត ដើម្បីលើកទឹកចិត្តទៅដល់យុត្តិធម៌សង្គម។ ក្នុងឆ្នាំ២០០៧ ដដែល កញ្ញា ឱក សុគន្ធកញ្ញា និងអ្នកម្ដាយ បានរួមគ្នាបើកនូវហាងកែសម្ផស្សមួយ ស្ថិតនៅក្នុងសង្កាត់ភ្នំពេញថ្មី និងបានពង្រីកបន្ថែមនូវសេវាកម្មថែមទៀត ដោយដាក់ឈ្មោះថា សំអាងការ និង ហាងកែសម្ផស្ស ឱក សុគន្ធកញ្ញា ដែលសាខាថ្មីនេះត្រូវបានបើក និងមានទីតាំងនៅផ្ទះលេខ 163 ផ្លូវ 215 សង្កាត់ផ្សារដេប៉ូ១ រាជធានីភ្នំពេញ។ កញ្ញា ក៏ជាអ្នកតំនាងឲ្យក្រុមហ៊ុនធំៗមួយចំនួនផងដែរដូចជា Suzuki ទឹកក្រូចកូកា-កូឡា និង Samsung ជាដើម។
ឱក សុគន្ធកញ្ញា កើតនៅថ្ងៃទី១៤ ខែកញ្ញា ឆ្នាំ១៩៨៧ ។មានកំពស់១,៦៣ ម៉ែត្រ,ទំងន់៥២ គីឡូក្រាម,
ពណ៌ដែលនាងចូលចិត្ត គឺពណ៌ស្វាយ។ កំរិតវប្បធម៌ បរិញ្ញាប័ត្រផ្នែកសិល្បៈ(សាកលវិទ្យាល័យភូមិន្ទវិចិត្រសិល្បៈ) ៕
Cambodia Kingdom Of Wonder 